Superylli portugez Cristiano Ronaldo ka bërë një kthesë të re në karrierën e tij, kësaj radhe larg fushës së blertë, por shumë pranë vendimmarrjes në futboll.

Sulmuesi 39-vjeçar ka blerë 25 për qind të aksioneve të klubit spanjoll UD Almería përmes strukturës së tij biznesore, CR7 Sports Investments, duke u bërë kështu një nga aksionarët kryesorë të klubit andaluzian.

Ky veprim konfirmon hyrjen përfundimtare të Ronaldos në botën e pronësisë së klubeve, në linjë me strategjinë që prej vitesh po e ndjekin edhe figura të tjera të mëdha të sportit botëror.

Lëvizja e Ronaldos është pjesë e projektit që udhëhiqet nga biznesmeni saudit Mohamed Al-Khereiji, pronari shumicë i Almerias që nga viti 2025, kur mori klubin pas largimit të Turki Al-Sheikh në një marrëveshje të vlerësuar rreth 100 milionë euro.

Al-Khereiji kontrollon “Saudi Media Group” dhe në një kohë të shkurtër ka forcuar ndjeshëm aspektin financiar të klubit, i cili tashmë konsiderohet si një nga skuadrat me vlerën më të lartë të tregut në Segunda División.

Hyrja e Cristiano Ronaldos nuk ndryshon kontrollin aksionar, por e forcon projektin me një partner me ndikim global të jashtëzakonshëm.

Në praktikë, 25 për qind e aksioneve i japin Ronaldos një rol vendimtar në drejtimet strategjike të klubit, pa u përfshirë në menaxhimin e përditshëm.

Almeria tashmë operon me modelin e zhvillimit të talenteve dhe shitjes së tyre për të gjeneruar fitime në tregun e transferimeve, ndërsa prania e markës “CR7” pritet të rrisë ndjeshëm dukshmërinë ndërkombëtare të klubit, të hapë dyer të reja komerciale dhe të sigurojë marrëveshje sponsorizimi që më parë ishin të paarritshme për një klub të këtij niveli.

Almeria aktualisht garon në kategorinë e dytë spanjolle me synimin e qartë për t’u rikthyer në elitën e futbollit spanjoll dhe për t’u stabilizuar në La Liga.

Prania e Cristiano Ronaldos në bord jo vetëm që forcon ambiciet e klubit, por rrit edhe presionin për rezultate, pasi projekti tashmë nuk matet vetëm me pikë në tabelë, por edhe me aftësinë për të kapitalizuar emrin e një prej figurave më të njohura në historinë e futbollit botëror./Arbresh.info